ကချင်ကျေးရွာတွေ အဓမ္မ ရွှေ့ပြောင်းခံရ

Map: RFAကချင်လွတ်မြောက်ရေးတပ်ဖွဲ့ KIA တပ်မဟာ (၄) ထိန်းချုပ်နယ်မြေ အတွင်းက ကျေးရွာ ၂ ရွာကို မြန်မာအစိုးရတပ် ထိန်းချုပ်ရာနယ်မြေ အတွင်းက ကားလမ်းအနီးကို စုစည်းကျေးရွာတွေ အဖြစ် ဒီကနေ့ အဓမ္မရွှေ့ပြောင်းလိုက်ကြောင်း KIA တပ်မှူးတဦးက ပြောပါတယ်။
မြန်မာနိုင်ငံ၏ မြောက်ဖက်ဆုံးတွင် တည်ရှိသော ကချင်ပြည်နယ်သည် အင်အားကြီး အိမ်နီးချင်း တရုတ်နှင့် အိန္ဒိယ နိုင်ငံတို့နှင့် နယ်နိမိတ်ချင်း ဆက်စပ်နေပါသည်။ (Map: RFA)
ပြောင်းရွှေ့လိုက်တဲ့ ကျေးရွာတွေဟာ သြဂုတ်လ ၃၁ ရက်နေ့က မြန်မာအစိုးရ စစ်ယာဉ်တန်းကို KIA တပ်မဟာ (၄) တပ်ဖွဲ့တွေ ခြုံခို တိုက်ခိုက်ခဲ့တဲ့ နေရာနဲ့ သိပ်မဝေးတဲ့ နေရာမှာ တည်ရှိခဲ့တဲ့ရွာတွေ ဖြစ်တယ်လို့ ဗိုလ်မှူးကြီးဇော်ရော်က ပြောပါတယ်။

၁၉၉၄ အပစ်အခတ် ရပ်စဲထားတဲ့ကာလ မတိုင်ခင်ကလည်း အဲဒီလို ဖြတ် ၄ ဖြတ်စနစ်ကို ကျင့်သုံးခဲ့ပြီး လူထုနဲ့ အဆက်အသွယ်ပြတ်အောင် လုပ်ဆောင်ခဲ့တာ ရှိခဲ့ပေမယ့် ပြီးခဲ့တဲ့ ဇွန်လကစလို့ တိုက်ပွဲတွေ ပြန်လည် ဖြစ်ပွားပြီးနောက်ပိုင်း အခုတခါ ဒီစနစ်ကို ပြန်ကျင့်သုံးလာတာလို့ ဗိုလ်မှူးကြီး ဇော်ရော် က ပြောပါတယ်။

KIA ကချင်လွတ်မြောက်ရေးအဖွဲ့ဟာ မြန်မာအစိုးရနဲ့ တဖွဲ့ချင်း အပစ်အခတ်ရပ်စဲမှာ မဟုတ်ဘဲ သူတို့ ပါဝင်ဖွဲ့စည်းထားတဲ့ ညီညွတ်သော တိုင်းရင်းသားများ ဖက်ဒရယ်ပြည်ထောင်စု ပေါ်ထွန်းရေးကောင်စီ UNFC အနေနဲ့သာ ဆွေးနွေးမယ်လို့ ကြေညာချက် ထုတ်ပြန်ထားပါတယ်။

ဒါ့အပြင် UNFC အနေနဲ့ အပစ်အခတ်ရပ်စဲရေးကို မြန်မာ ပြည်ထောင်စု အစိုးရနဲ့သာ တိုက်ရိုက် ဆွေးနွေးမှာဖြစ်ပြီး ပြည်နယ်အစိုးရနဲ့ ဆွေးနွေးမှာမဟုတ်ကြောင်း ကြေညာထားပါတယ်။