အာဆီယံဥက္ကဋ္ဌရာထူး ဒေါ်အောင်ဆန်းစုကြည်အသံ အရေးပါ

9/20/2011 11:17:00 PMတွင်ရေးသည်

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်၏ အသံကို အလေးထားပြီး မြန်မာနိုင်ငံကို ၂၀၁၄ ခုနှစ် အရှေ့တောင်အာရှနိုင်ငံများအသင်း အာဆီယံ၏ အလှည့်ကျ ဥက္ကဋ္ဌ နေရာ ပေးရေး မပေးရေး ဆုံးဖြတ်မည်ဟု အင်ဒိုနီးရှားနိုင်ငံခြားရေးဝန်ကြီးက ပြောလိုက်ကြောင်း AP သတင်းတပုဒ်တွင် ယနေ့ ရေးသားထားသည်။

ASEAN_Daw_Suu

ထို့အပြင် လူထုအခြေပြု လူမှုအဖွဲ့အစည်းတို့၏ အသံကိုလည်း နားထောင်မည်ဟု ၀န်ကြီး မစ္စတာ မာတီ နာတာလီဂါဝါက ပြောလိုက်သည်။

အင်ဒိုဝန်ကြီးက လာမည့်လတွင် မြန်မာနိုင်ငံသို့ သွားရောက်၍ မြန်မာနိုင်ငံ၏ နိုင်ငံရေးအခြေအနေ ပြောင်းလဲမှုများကို အကဲဖြတ်ဦးမည်ဟု ဆိုထားသည်။

အင်ဒိုနီးရှားသည် လက်ရှိ အလှည့်ကျ အာဆီယံ ဥက္ကဋ္ဌ တာဝန် ယူထားသည့် နိုင်ငံ ဖြစ်သည်။

သမ္မတ ဦးသိန်းစိန် အစိုးရက မြန်မာနိုင်ငံအနေဖြင့် အာဆီယံဥက္ကရာထူးကို လက်ခံလိုကြောင်း ဇူလိုင်လအတွင်း အင်ဒိုနီးရှားနိုင်ငံ ဘာလီကျွန်းတွင် ကျင်းပသော အာဆီယံ နိုင်ငံခြားရေးဝန်ကြီးများ အစည်းအဝေးတွင် တရားဝင် ထုတ်ဖော် ပြောဆိုခဲ့သည်။

အစိုးရအဆက်ဆက် စစ်ဗိုလ်ချုပ်များ ကြီးစိုးသော မြန်မာနိုင်ငံကို အလှည့်ကျ ဥက္ကဋ္ဌတာဝန် ပေးအပ်ခြင်း မပြုရန် တောင်းဆို ဖိအားပေးသူများထဲတွင် အစိုးရအဖွဲ့များ၊ လူ့အခွင့်အရေးအဖွဲ့များလည်း ပါဝင်သည်။

ဒီမိုကရေစီဖော်ဆောင်ရန် နှောင့်နှေးမှု၊ နိုင်ငံရေးသမားများကို ထိန်းသိမ်းထားမှု၊ ဒေသအနှံ့တွင် လုပ်အားပေး ခိုင်းစေမှုတို့ကို ထောက်ပြပြီး ကန့်ကွက် ဖိအားပေးကြခြင်း ဖြစ်သည်။

မြန်မာနိုင်ငံသည် ၂၀၀၆ ခုနှစ် အာဆီယံအသင်း အလှည့်ကျ ဥက္ကဋ္ဌ ဖြစ်မည့် အခြေအနေနှင့် ကြုံခဲ့ရဖူးသည်။ သို့သော်လည်း နိုင်ငံတကာ ဖိအားများကြောင့် မြန်မာအစိုးရက ထိုတာဝန်ကို ပြည်တွင်းရေး ပြဿနာများကို အကြောင်းပြ၍ ငြင်းပယ်ခဲ့သည်။

မကြာသေးမီက သမ္မတ ဦးသိန်းစိန်သည် ဒေါ်အောင်ဆန်းစုကြည် နှင့် နေပြည်တော်တွင် တွေ့ဆုံခဲ့သည်။ အလုပ်သမားဝန်ကြီး ဦးအောင်ကြည်ကလည်း ဒေါ်အောင်ဆန်းစုကြည်နှင့် ၂ ကြိမ် တွေ့ဆုံ ခဲ့သည်။

အစိုးရက ထိုသို့ တွေ့ဆုံခြင်းမှာ အာဆီယံ ဥက္ကဋ္ဌ ရာထူးရရှိရေးအတွက် လုပ်ဆောင်နေခြင်းသာ ဖြစ်ကြောင်း အတိုက်အခံ နိုင်ငံရေးသမား အများအပြားက ဝေဖန်နေကြသည်။

အာဆီယံအသင်းဝင် အရှေ့တောင်အာရှနိုင်ငံများသည် အသင်း ဥက္ကဋ္ဌ ရာထူးကို အလှည့်ကျ တာဝန်ယူကြသည်။ ဥက္ကဋ္ဌ ရာထူး သက်တမ်းမှာ တနှစ် ဖြစ်သည်။

ဆက်လက် မျှဝေရန်... :

မြန်မာမီဒီယာများ