မြန်မာအစိုးရသည် တနိုင်ငံလုံးရှိ ပြည်သူများသို့ ကချင်လွတ်မြောက်ရေးအဖွဲ့ (KIO)နှင့် ပတ်သက်ပြီး မဟုတ်မမှန်သတင်းအမှားများကို လုပ်ကြံ ဖန်တီးရေးသား ဖြန့်ဝေခြင်းအားဖြင့် KIO အား စိတ်ဓါတ်စစ်ဆင်ခြင်း စတင်လိုက်သည်။KIO နှင့် ၎င်း၏လက်နက်ကိုင် KIA အား ရှုတ်ချသည့် စာရွက်ငယ်များကို မြစ်ကြီးနား၊ ဗန်းမော်၊ ၀ိုင်းမော်နှင့် ဖားကန့်မြို့များတွင် သြဂုတ်လ က စတင်ပြီး ဖြန့်ကျဲ ခြင်းပြုလုပ်လာသည်ဟု မြို့ခံများပြောသည်။
KIO/KIA ရှုတ်ချစာများအား ကချင်ပြည်နယ် ဒုတိယအကြီးဆုံ ဗန်းမော်မြို့တွင် သြဂုတ် ၂၀ ရက်၊ စက်တင်ဘာ ၃ ရက်နှင့် ၅ ရက်နေ့များတွင် အာဏာပိုင်များ ဖြန့်ကျဲထားသည်ကို မြင်တွေ့ရသည်ဟု ဒေသခံများပြောသည်။
“အဲဒီပိုစတာတွေကို မြို့ထဲ မှာ အဓိက ဖြန့်ကြတာ။ တချို့သူတွေကျတော့ ဒါတွေကြောင့် ဒွိဟ ဖြစ်သွားကြတယ်။ ဒါမဲ့ သိတဲ့လူတွေကျတော့လည်း အစိုးရရဲ့ ၀ါဒဖြန့်တာလို့ ပြောနေကြတယ်။” ဟု ဗန်းမော် မြို့ခံတစ်ဦး ကချင်သတင်းဌာနသို့ပြောသည်။
ဝါဒဖြန့်စာရွက်များတွင် KIO/KIA သည် ကချင်ပြည်နယ် ငြိမ်းချမ်းရေးကိုဖျက်ဆီးသူ၊ အစိုးရနှင့် ငြိမ်းချမ်းရေး ဆွေးနွေးရန် မလိုလားသူအဖြစ် ဖော်ပြထားပါသည်။
စက်တင်ဘာ ၆ ရက်ထုတ် အစိုးရပိုင် မြန်မာ့အလင်းသတင်းစာတွင်လည်း “ကေအိုင်အဖွဲ့အတွင်း ပဋိပက္ခပြင်းထန်၊ ငြိမ်းချမ်းရေး လိုလားသည့်အဖွဲ့နှင့် မလိုလားသည့်အဖွဲ့တို့ အစည်းအဝေးတစ်ခုတွင် စကားများပြီး အချင်းချင်းပစ်ခတ်၍ သေဆုံးဒက်ရာရမှုရှိ်” ဟု ရေးသားဖော်ပြခဲ့သည်။
သို့သော် ယင်းသတင်း “လုံးဝ မှန်ကုန်မှုမရှိကြောင်း” KIA ဒုတိယ စစ်ဦးစီးချုပ် ဗိုလ်မှူးချုပ် ဂွမ်မော် က စက်တင်ဘာ ၆ ရက် ည BBC နှင့် RFA မြန်မာပိုင်းအစီအစဉ်များတွင် တုန့်ပြန် ပြောဆိုသွားသည်။
ပထမဆုံး မြန်မာအစိုးရအဖွဲ့သစ်၏ သြဂုတ် (၁၂) ရက်နေ့ နေပြည်တော် သတင်းစာရှင်းလင်းပွဲတွင်လည်း KIO/KIA အား အဓိကထားကာ သောင်းကျန်းသူ အကြမ်းဖက်အဖွဲ့အဖြစ် ရှုတ်ချခဲ့သည်။
No comments:
Post a Comment