အစိုးရက အကျဉ်းသား ၆၃၅၉ ဦးကို မနက်ဖြန် လွတ်ငြိမ်းချမ်းသာခွင့်နဲ့ လွှတ်ပေးမယ်လို့ ကြေညာလိုက်ပါတယ်။
နိုင်ငံတော် သမ္မတရုံးရဲ့ ထုတ်ပြန်ကြေညာချက်ကို ဒီကနေ့ နေ့လယ် ၁ နာရီအချိန်မှာ MRTV 4 ရုပ်သံလိုင်း သတင်းအစီအစဉ်က ထုတ်ပြန်ကြေညာလိုက်တာပါ။
ဒီလွတ်ငြိမ်း ချမ်းသာခွင့်မှာ အသက်အရွယ်ကြီးရင့်သူတွေ၊ ကျန်းမာရေးမကောင်းသူတွေနဲ့ ကိုယ်လက်အင်္ဂါချို့တဲ့သူတွေ အပါအဝင် ထိုက်သင့်တဲ့ ပြစ်ဒဏ်ကျခံခဲ့ရပြီး စည်းကမ်းနဲ့အညီနေထိုင်ခဲ့တဲ့ အကျဉ်းသားတွေ အကျုံးဝင်တယ်လို့ ကြေညာချက်ကဆိုပါတယ်။
ဒီလွတ်ငြိမ်း ချမ်းသာခွင့်ဟာ သမ္မတဦးသိန်းစိန်ရဲ့ အိန္ဒိယနိုင်ငံခရီးစဉ်မတိုင်ခင် လွတ်ငြိမ်းချမ်းသာခွင့်ပေးမယ်ဆိုတဲ့ ခန့်မှန်းပြောဆိုချက်တွေကို အတည်ပြုပေးလိုက်တာဖြစ်ပါတယ်။
ပြီးခဲ့တဲ့ မေလလယ်ပိုင်းတုန်းကလည်း အကျဉ်းသား တသောင်းခွဲနီးပါးကို ပြစ်ဒဏ်တနှစ် လျှော့ပေါ့ပေးခဲ့တုန်းက နိုင်ငံရေးအကျဉ်းသား ရာဂဏန်းလောက်ပဲ ပါခဲ့တာကြောင့် ယခုပြန်လည်လွှတ်ပေးသူတွေထဲတွင် နိုင်ငံရေးအကျဉ်းသား (ယုံကြည်ချက်ကြောင့်ပြစ်ဒဏ်ကျခံနေရသူ) ဘယ်နှစ်ဦးပါဝင်မည် ဆိုသည်ကို မသိနိုင်သေးပါဘူး။
စစ်အစိုးရ လက်ထက်တုန်းကရော အခုလက်ရှိ သမ္မတဦးသိန်းစိန် အစိုးရလက်ထက်မှာပါ မြန်မာနိုင်ငံမှာ နိုင်ငံရေးအကျဉ်းသား မရှိဘူးလို့ မပြောင်းမလဲ ရပ်တည်တုံ့ပြန်နေပေမယ့် ကုလသမဂ္ဂ အပါအဝင် အနောက်နိုင်ငံတွေနဲ့ နိုင်ငံရေးအကျဉ်းသားကိစ္စ ဆောင်ရွက်သူတွေကတော့ နိုင်ငံရေးအကျဉ်းသား ၂ဝဝဝခန့်ရှိနေကြောင်း တစိုက်မတ်မတ်ပြောဆိုနေပါတယ်။
လတ်တလောမှာ နိုင်ငံတဝန်းက အကျဉ်းထောင်တွေနဲ့ ရဲဘက်စခန်းတွေထဲမှာ နိုင်ငံရေးအကျဉ်းသား ၁၅၀၀ ခန့်ရဲ့ စာရင်းရရှိထားတယ်လို့ နိုင်ငံရေးအကျဉ်းသားစာရင်းကို လက်ရှိပြုစုနေတဲ့ ပြည်တွင်းအခြေပြု ဒီမိုကရေစီကွန်ရက်အဖွဲ့က ရှစ်ဆယ့်ရှစ်မျိုးဆက်ကျောင်းသား ကိုတိုးကျော်လှိုင်က ပြောပါတယ်။
အစိုးရက အသိအမှတ်ပြုတဲ့ နိုင်ငံရေးအကျဉ်းသား (ယုံကြည်ချက်ကြောင့် အကျဉ်းကျခံနေသူ) စာရင်းဟာ ၄ဝဝခန့်သာ အသိအမှတ်ပြုတာကြောင့် သူတို့စာရင်းထက် လူ ၁၀၀၀ လောက် နည်းနေတယ်လို့ ကိုတိုးကျော်လှိုင်က ပြောပါတယ်။
တပ်မ တော်အစိုးရဟာ ခွန်ထွန်းဦး၊ စိုင်းညွန့်လွင်စတဲ့ တိုင်းရင်းသားခေါင်းဆောင်တွေ၊ မင်းကိုနိုင်၊ ကိုကိုကြီး စတဲ့ ကျောင်းသားခေါင်းဆောင်တွေ၊ အရှင်ဂမ္ဘီရစတဲ့ သံဃာ့ခေါင်းဆောင်တွေနဲ့ နိုင်ငံရေးလှုပ်ရှားသူတွေကို နှစ်ရှည်ထောင်ဒဏ်တွေ ချမှတ်ပြီး မိသားစုနဲ့ ဝေးရာထောင်တွေကို ပို့ဆောင်ထားပါတယ်။
No comments:
Post a Comment