မျှော်လင့်ချက်များစွာ

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို မြန်မာ့ရုပ်မြင်သံကြား ည ၈ နာရီ သတင်းတွင် နှစ်ညဆက်တိုက် တွေ့လိုက်ရပြီး ကတည်းက မခင်ထားတို့ မိသားစု စကားဝိုင်းအတွင်း နိုင်ငံရေးစကားများသာ ပြောဖြစ်နေကြသည်ဟု ဆိုသည်။

286415_10150260697139094_769844093_7663316_713778_o

နေပြည်တော်တွင် ဒေါ်အောင်ဆန်းစုကြည်နှင့် သမ္မတ ဦသိန်းစိန် တွေ့ဆုံမှုကို မြန်မာ့ရုပ်မြင်သံကြားက သြဂုတ်လ ၁၉ ရက်နေ့ ည ၈း၀၀ နာရီတွင် ထုတ်လွှင့်သွားသည်ကို တွေ့ရစဉ် (ဓာတ်ပုံ - AP)

“ဒေါ်စုကို ဦးသိန်းစိန်နဲ့ တီဗီထဲ ပါတာကို စတွေ့တာက အငယ်မ။ အဲဒီမှာ အစ်မရေ လာပါဦး၊ အစ်မရေ လာပါဦးနဲ့ နင်းအော်တာနဲ့ အားလုံး ထွက်ကြည့်တော့တာပဲ” ဟု မခင်ထားက ပြောပြခဲ့သည်။

သြဂုတ်လ ၁၉ ရက်နေ့ ည ၈ နာရီ ရုပ်မြင်သံကြား သတင်းတွင် သမ္မတ ဦးသိန်းစိန်နှင့် ဒေါ်အောင်ဆန်းစုကြည် တွေ့ဆုံပွဲကို ထုတ်လွှင့်ခဲ့သည့် ကိစ္စနှင့် ပတ်သက်ပြီး ပြောပြနေခြင်း ဖြစ်သည်။

“ပြည်သူ့ အကျိုးစီးပွားအတွက် ပူးပေါင်းမယ်ဆိုတာ ထူးခြားတယ်ပေါ့။ တကယ်ပဲ ပြည်သူတွေ လိုချင်တဲ့ ဒီမိုကရေစီကို ပေးတော့မယ်လို့ကို မျှော်လင့်လိုက်တာ” ဟု မခင်ထား၏ မိခင်ဖြစ်သူ အသက် ၆၈ နှစ်အရွယ် ဒေါ်နုအေးကြည်က ပြောသည်။

ဒေါ်အောင်ဆန်းစုကြည်နှင့် ဦးအောင်ကြည်တို့ အကြိမ်ကြိမ် တွေ့ဆုံခဲ့သော်လည်း အကြောင်းမထူးလှသောကြောင့့် 
စိတ်ပျက်နေရာမှ ဒေါ်အောင်ဆန်းစုကြည်နှင့် သမ္မတဦးသိန်းစိန်တို့ တွေ့ဆုံကြသည်ကို မမျှော်လင့်ဘဲ ရုပ်မြင်သံကြားမှ တွေ့လိုက်၊ ကြားလိုက်ရသည်နှင့်ပင် ၀မ်းသာကျေနပ်မိကြောင်း သူက ဆိုသည်။

ဒေါ်နုအေးကြည်၏ ပြောဆိုပုံနှင့် အမူအရာများကို သဘောကျစွာ ပြုံးကြည့်နေသည့် ခင်ပွန်းဖြစ်သူ စစ်မှုထမ်းဟောင်း ဒုတိယ အရာခံ ဗိုလ်ကြီး လှဦး ကလည်း ထိုနေ့သတင်းထဲ၌ သမ္မတ အိမ်တော်၌ ဗိုလ်ချုပ်အောင်ဆန်းနှင့်တကွ အာဇာနည်ကြီးများ၏ ဓာတ်ပုံများ ချိတ်ထားသည်ကို တွေ့ရသောကြောင်း၊ ၀မ်းသာမိကြောင်း ပြောသည်။

“ထင်ကို မထင်ထားတာ။ ဗိုလ်ချုပ်သမီးကို ဗိုလ်ချုပ်ဓာတ်ပုံ ရှေ့မှာရပ်ပြီး စကားပြောတာ၊ ဓာတ်ပုံရိုက်ကြတာ၊ ပြည်သူတွေကိုလည်း ထုတ်လွှင့်ပြတာ ဆိုတော့ ကောင်းပြီလို့ ထင်တယ်” ဟု အသက် ၇၄ နှစ်အရွယ် အငြိမ်းစား ဒုအရာခံဗိုလ်ကြီးက ဆိုသည်။

အငြိမ်းစား တပ်မတော်သားဟောင်း တဦးအနေဖြင့် တပ်မတော်အစိုးရ လက်ထက်က တပ်မတော်၏ လုပ်ရပ်တချို့ကြောင့် ရှက်မိခဲ့ကြောင်း၊ တပ်မတော်၏ သမိုင်းကြောင်းကို ကောင်းစေချင်ခဲ့ကြောင်း၊ ဗိုလ်ချုပ်အောင်ဆန်းကဲ့သို့ မြန်မာပြည်၏ အထင် ကရ ပုဂ္ဂိုလ်ကြီး၏ သမီးနှင့် အစိုးရ အဆင်ပြေ ပူးပေါင်းလုပ်ဆောင်မည်ကို သဘောကျ ကျေနပ်ကြောင်း ပြောသည်။

ထိုသတင်းကြားပြီးနောက် သူတို့နေထိုင်ရာ မင်္ဂလာတောင်ညွန့်မြို့နယ် အတွင်းရှိ မိသားစုတိုင်းနီးပါး စိတ်ဝင်စားလျက် ရှိနေကြပြီး ဒီမိုကရေစီ ရရှိတော့မည်ဟု မျှော်လင့်နေကြကြောင်း မခင်ထား၏ မိခင်က ဆိုသည်။

“အန်တီတို့လည်း ထူးပြီဆိုပြီး ၀မ်းသာ၊ မျက်နှာချင်းဆိုင်အခန်းက လူတွေလည်း သတင်းပြီးတော့ အကုန် ထွက်လာပြီး ပြောကြတာ။ မိုးလင်းတော့လည်း ဈေးထဲမှာပြောနေတာပဲ။ ဒီမိုကရေစီ အစစ် ရတော့မှာဆိုပြီး ပြောနေကြတယ်” ဟု
သူက ပြောသည်။

သမ္မတနှင့် ဒေါ်အောင်ဆန်းစုကြည်တို့ တွေ့ဆုံဆွေးနွေးပြီး ပြည်သူ့အကျိုးအတွက်ပူပေါင်းဆောင်ရွက်မည်ဆိုသော ထိုသတင်းမှာ မြန်မာပြည်သူလူထု တရပ်လုံးအတွက် ၀မ်းမြောက်ဖွယ်ကောင်းပြီး ထူးခြားလေးနက်သော သတင်းကြီး ဖြစ်ကြောင်း မန္တလေးမြို့ ချမ်းအေးသာစံမြို့နယ်မှ ဒေါ်လှလေးငယ်က ဆိုသည်။

“နောက်နေ့လည်း တအိမ်လုံး စောင့်ကြည့်တယ် ပြောရမှာပဲ။ အန်တီစုက မြန်မာအင်္ကျီ အ၀ါရောင်လေးနဲ့ ရှေ့ဆုံးတန်းမှာ အစိုးရ လူကြီးတွေနဲ့ အတူတူထိုင်ပြီး အစည်းအဝေးပွဲ တက်နေတာ တွေ့တော့ တအိမ်လုံးက လက်ခုပ်ဝိုင်းတီး လိုက်ကြတာ။
ကျမတို့ အဒေါ်ဆို ၀မ်းသာလွန်းလို့ မျက်ရည်တွေ ကျကုန်ရောပဲ” ဟု သြဂုတ်လ ၂၀ ရက်နေ့က တွေ့ခဲ့ရသည့် သတင်းနှင့် ပတ်သက်၍ သူက ဆက်ပြောသည်။

ဒေါ်လှလေးငယ်တို့ မိသားစုသည် လက်ရှိ နိုင်ငံရေးအခြေအနေကို နားမလည်လှသော်လည်း ရှေ့လျှောက် ဒေါ်အောင်ဆန်းစုကြည်နှင့် ပူးပေါင်းဆောင်ရွက်ပါက ကောင်းလာမည်ဟု ယုံကြည်ထားကြောင်း၊ ပညာရေးနှင့် ကျန်းမာရေး ကဏ္ဍအား ဒေါ်အောင်ဆန်းစုကြည်ကို ဦးဆောင်ခွင့်ပေးလိမ့်မည်ဟု ပါးစပ်သတင်းများ ကြားနေရကြောင်း ဒေါ်လှလေးငယ်က ဆိုသည်။

“ဟုတ်မဟုတ်တော့ မသိဘူးပေါ့။ ကျမတို့ မြို့မှာတော့ ဒေါ်အောင်ဆန်းစုကြည်က ကျန်းမာရေးနဲ့ ပညာရေးကဏ္ဍကို တာဝန်ယူချင်တယ်လို့ ပြောတယ်ဆိုပြီး သတင်းထွက်နေတာပဲ။ ကြားရတဲ့ သူတိုင်းက ၀မ်းသာလွန်းလို့ သာဓုတွေ ခေါ်နေကြတယ်” ဟု သူက ပြောသည်။

ဒေါ်အောင်ဆန်းစုကြည်သည် နေအိမ်အကျယ်ချုပ်မှ လွတ်မြောက်ပြီး ပြည်ထောင်စုဝန်ကြီး ဦးအောင်ကြည်နှင့် မေလ ၂၅ ရက်နေ့တွင် ပထမအကြိမ် ရန်ကုန် စိမ်းလဲ့ကန်သာတွင် တွေ့ဆုံခဲ့ကြပြီးနောက် သြဂုတ်လ ၁၂ ရက်နေ့က ၀န်ကြီး ဦးအောင်ကြည်နှင့် ဒုတိယအကြိမ် တွေ့ဆုံခဲ့ရာ တရားဥပဒေ စိုးမိုးရေး၊ စိတ်ဝမ်းကွဲပြားမှု ပပျောက်ရေး၊ အများပြည်သူ
အကျိုးဖြစ်ထွန်းရေး စသည့် ကိစ္စရပ်တို့အား အဓိကထား ဆွေးနွေးခဲ့ကြသည်ဟု သိရသည်။

သြဂုတ်လ ၁၄ ရက်နေ့ နေအိမ်အကျယ်ချုပ်မှ လွတ်မြောက်ပြီးနောက် ပထမဆုံးအကြိမ် နိုင်ငံရေးခရီးစဉ်အဖြစ် စတင် ထွက်ရှိခဲ့သော ပဲခူးခရီးစဉ် အောင်မြင်ပြီးနောက် နိုင်ငံတော်သမ္မတက နေပြည်တော်သို့ ဖိတ်ခေါ်ခဲ့ခြင်း ဖြစ်သည်ဟု နီးစပ်သည့် အသိုင်းအဝန်းက ဆိုသည်။

သမ္မတ မိန့်ခွန်းထဲ၌ ပြည်ပရောက် နိုင်ငံသားများအား ကြိုဆိုသည့်သဘော ပြောခြင်း၊ နိုင်ငံခြား ၀င်ငွေအမျိုးအစား အားလုံး၏ အခွန်ပေးဆောင်မှုအား ၁၀ ရာခိုင်နှုန်းမှ ၂ ရာခိုင်နှုန်းအထိ ၆ လ လျှော့ချပေးခြင်း၊တိုင်းရင်းသား လက်နက်ကိုင် အဖွဲ့အစည်း များအား ငြိမ်းချမ်းရေး ကမ်းလှမ်းခြင်း စသည်တို့ကို ဆောင်ရွက်နေသည့်အတွက် ကျေနပ်မိကြောင်း၊ ထို့အပြင် နိုင်ငံရေး အကျဉ်းသားများကိုပါ လွတ်လပ်ခွင့် ပေးမည်ဆိုပါက ပို၍ ပြည်သူလူထု၏ ယုံကြည်လေးစားမှုကို ရရှိနိုင်ကြောင်း စစ်မှုထမ်းဟောင်း ဦးလှဦးက ပြောသည်။

“ကျနော်တို့ ပြည်သူတွေအတွက်ကတော့ ဒါ သတင်းကောင်းပဲ။ မင်္ဂလာရှိသော သတင်းပါပဲ။ ဒေါ်အောင်ဆန်းစုကြည်နဲ့ တွေ့ကြပြီ၊ ဆွေးနွေးကြပြီဆိုတော့ မကြာခင်မှာ မြန်မာနိုင်ငံရဲ့ အနာဂတ်လည်း လှပတော့မယ်လို့ပဲ မျှော်လင့်ပါတယ်” ဟု သူက ဆိုသည်။