လှည်းတန်း ဆန္ဒပြသူများ ပြန်လည်လွတ်မြောက်

ယမန်နေ့ နေ့လယ်က ရန်ကုန်မြို့ လူစည်ကားသည့် လှည်းတန်းလမ်းဆုံတွင် ဆန္ဒပြကြသော ပြည်မြန်မာကုန်တိုက်မှ ဈေးသည်နှစ်ဦးကို အာဏာပိုင်တို့က ၇ နာရီကျော်ကြာ ထိန်းသိမ်းပြီး ပြန်လွှတ်ပေးလိုက်သည်။

အောက်တိုဘာ ၂ ရက်နေ့ နေ့လယ် ၁၂ နာရီ ၀န်းကျင်က ပြည်မြန်မာကုန်တိုက် တည်ရှိရာ လှည်းတန်းလမ်းဆုံတွင် ဆန္ဒပြနေကြသော ဈေးသည်များ (ဓာတ်ပုံ - Messenger Journal / Facebook)

ကုန်တိုက်ဆိုင်ခန်းများ အသိမ်းခံရမှုကြောင့် နစ်နာကြေးရလိုမှုဖြင့် ဆန္ဒပြသည့် ဈေးသည် ၂၀ ခန့် အနက်မှ ပိုစတာများ ကိုင်ဆောင်ပြီး  ဆန္ဒထုတ်ဖော်သူ မမြတ်သီတာဝင်း၊ မခင်မျိုးလွင်တို့ ကမာရွတ်မြို့နယ် အုပ်ချုပ်ရေးမှူးရုံးတွင် ယာယီ အထိန်းသိမ်းခံရခြင်း ဖြစ်သည်။

"နောက် ဒီလိုမျိုး  လုပ်ရပ်မျိုး မလုပ်တော့ပါဘူးလို့ လက်မှတ် ထိုးခဲ့ရတာ" ဟု ပြန်လွတ်လာသူတဦးဖြစ်သည့် မခင်မျိုးလွင်က ပြောသည်။

လှည်းတန်းလမ်းဆုံသည် ယခင်က ရန်ကုန်မှ တက္ကသိုလ်ကျောင်းသားတို့၏ ဆန္ဒပြပွဲများ ပေါ်ပေါက်ခဲ့ဖူးသည့် နေရာတခု ဖြစ်သည်။

ပြည်မြန်မာ ကုန်တိုက် ဈေးသည်တို့က နစ်နာကြေးရသည်အထိ ငြိမ်းချမ်းစွာ ဆန္ဒထုတ်ဖော်မှုများ ပြုလုပ်လိုသည်ဟု ဆိုသည်။

ယမန်နေ့ ညနေပိုင်းအထိ ဆန္ဒပြပွဲဖြစ်ခဲ့သည့် ကုန်တိုက်အနီးတွင် လုံခြုံရေးတပ်ဖွဲ့ဝင်များ ရှိနေကြောင်း မျက်မြင်သက်သေတဦးထံမှ သိရသည်။

ပြည်မြန်မာကုန်တိုက်မှ ဈေးသည်များသည် ဆိုင်ခန်းပိုင်ရှင်များမဟုတ်သဖြင့် ကုန်တိုက်မှ ဖယ်ရှားပေးရမည်ဟု စီးပွား/ကူးသန်းဝန်ကြီးဌာန အကြီးတန်းအရာရှိတဦးက ပြောသည်။

ဆိုင်ခန်းငှားရမ်းထားသူများက အဆင့်ဆင့် လက်လွဲရောင်းချရာမှ ဆိုင်ခန်းတခန်း၏ပေါက်ဈေး ကျပ်သိန်းရာချီ ဖြစ်နေကြောင်း၊ ယမန်နေ့က ဆန္ဒပြသူများသည်လည်း တဆင့် ပြန်လည် ၀ယ်ယူထားသူများဖြစ်ကြောင်း ထိုအရာရှိက ပြောသည်။

"ဒီဆိုင်ခန်းတွေက အစိုးရပိုင်တာ။ ဘယ်သူမှ မပိုင်ဘူး၊ တရားမ၀င် စာချုပ်တွေနဲ့ တဆင့် တဆင့် ရောင်းပြီး အခုလို ဆူပူမှုလုပ်တာ မကောင်းဘူးပေါ့ဗျာ" ဟု အမည်မဖော်လိုသူ အရာရှိက ပြောသည်။

ပြည်မြန်မာကုန်တိုက်ကို စီးပွား/ကူးသန်းဝန်ကြီးဌာနက ယခုနှစ်အတွင်း လေလံတင် ရောင်းချခဲ့ရာ ငှားရမ်းထားသော ဈေးသည်များက ကုန်တိုက်မှ ပြောင်းရွှေ့ပေးခဲ့ရသည်။

လေလံရသွားသူမှာ AA စီးပွားရေးအုပ်စုနှင့် Myanmar Marketing Research and Development ကုမ္ပဏီတို့ ဖြစ်သည်။

ကမာရွတ်မြို့နယ် လှည်းတန်းလမ်းဆုံရှိ စက်ဝိုင်းပုံ တည်ဆောက်ထားသော ပြည်မြန်မာကုန်တိုက် အဆောက်အအုံတွင် ဆိုင်ခန်းပေါင်း ၉၀ ကျော် ရှိသည်။