ကမ္ဘာ့ဈေးအချိုဆုံး Tablet Computer

ကမ္ဘာ့ဈေးအချိုဆုံး Tablet computer ကို ပြနေတဲ့ တက္ကသိုလ်ကျောင်းသူ

အမေရိကန် ဒေါ်လာ ၃၅ ဒေါ်လာသာ တန်ဖိုးရှိတဲ့ Tablet Computer ကို အိန္ဒိယနိုင်ငံက အောက်တိုဘာ ၅ ရက်နေ့မှာ မိတ်ဆက်ပေးလိုက်ပါတယ်။ နာမည်ကတော့ ဟိန္ဒီလို Aakash ဖြစ်ပြီး အာကာ သို့မဟုတ် ကောင်းကင်လို့ အဓိပ္ပါယ်ရပါတယ်။

Apple ရဲ့ iPad က ၄၉၉ ဒေါ်လာ၊ Amazon ရဲ့ Kindle Fire က ၁၉၉ ဒေါ်လာ၊ HP က touch pad က ၉၉ ဒေါ်လာဝန်းကျင်ရှိနေချိန်မှာ အိန္ဒိယက Datawind ရဲ့ Aakash ကတော့ ၃၅ ဒေါ်လာသာ ပေးရပါမယ်တဲ့။

ကျောင်းသားတိုင်း၊ လူတိုင်းလူတိုင်း နည်းပညာနဲ့ ကွန်ပြူတာ အတွေ့အကြုံတွေ ရနိုင်ဖို့ ရည်ရွယ်တယ်၊ ဒါဟာ အိန္ဒိယနည်းပညာသမိုင်းမှာ မှတ်ကျောက်တင်လိုက်တာပဲလို့ အိန္ဒိယ လူ့စွမ်းအားအရင်းအမြစ်ဖွံ့ဖြိုးရေး ၀န်ကြီး ကာပေးလ် ဆီဘာလ်က ဆိုပါတယ်။

ဒီလို ဈေးအင်မတန်ချိုသာတဲ့ Tablet Computer ကို လုပ်မယ်လို့ စပြီးပြောတုန်းက ကျနော်တို့ကို အရူးတွေလို့ လူတွေကပြောပြီး လှောင်ပြောင်ကြတယ်။ လူ့စွမ်းအားအရင်းအမြစ်ဖွံ့ဖြိုးရေး ၀န်ကြီးက အတွင်းရေးမှူး စင်ဟာ က ပြောပါတယ်။

၇ လက်မ အရွယ် touch screen, 13 အောင်စ အလေးချိန်၊ 256MB RAM, 2GB internal memory, external memory ကတော့ 32 GB အထိ ထည့်လို့ရမှာဖြစ်ပါတယ်။ USB drive slot ၂ ခုပါပြီး Battry life ကတော့ ၃ နာရီသုံးလို့ရမယ်ဆိုတဲ့ အဲ့ဒီ Tablet ဟာ Google ရဲ့ Andriod 2.2 (Froyo) operation system နဲ့ပါ။

အခြား Tablet Computer တွေမှာလိုပဲ စာရိုက်တာ၊ E-mail, Facebook, Twitter စတဲ့ လူမှုကွန်ယက်တွေနဲ့ Video conferencing အတွက် application တွေ၊ Apple ရဲ့ iPone, iPad တွေမှာပါတဲ့ iBook လို စာအုပ်စင်၊ ဂိမ်းဆော့စရာတွေလည်း ပါဝင်ပါတယ်။

ဒါပေမယ့် အင်တာနက် သုံးချင်တယ်ဆိုရင်တော့ WiFi နဲ့ပဲ သုံးရမှာဖြစ်ပါတယ်။

ဒီ tablet ကို စလုပ်မယ်လို့ဆိုကတည်းက ကျောင်းသူကျောင်းသားတွေနဲ့ ငွေကြေးမတတ်နိုင်သူတွေကို ရည်ရွယ်ထားတာကြောင့် လောလောဆယ်မှာတော့ အထက်တန်းကျောင်းသားတွေကို ၃၅ ဒေါ်လာ (ရူပီး ၁၇၀၀ ၀န်းကျင်) နဲ့ အရင်ဖြန့်ဝေပေးနေပါတယ်။ ကွန်ပြူတာလုံးဝ မကိုင်ဖူးတဲ့၊ ကွန်ပြူတာ နည်းပညာကို မသိနားမလည်သေးတဲ့၊ မြို့ကြီးပြကြီးနဲ့ အလှမ်းဝေးတဲ့ ဒေသတွေက ကျောင်းသူ၊ ကျောင်းသားတွေဆီကို ရောက်တဲ့အထိ ဖြန့်ဝေမယ်လို့ သိရပါတယ်။

အထက်တန်းကျောင်းသားတွေ၊ တက္ကသိုလ်ကျောင်းသားတွေဟာ ကျောင်းသားကဒ်ပြပြီး ၃၅ ဒေါ်လာဈေးနဲ့ ၀ယ်ယူနိုင်နေပါပြီ။

ဒီ Tablet ကို ၀ယ်ချင်တဲ့ တခြားသူတွေကိုတော့ ရူပီး ၃၀၀၀ (ဒေါ်လာ ၆၀ ၀န်းကျင်) နှုန်းနဲ့ နိုဝင်ဘာလကုန်မှာ စ ရောင်းပေးမယ်လို့ သိရပါတယ်။

ဒီ Tablet ကို နိုင်ငံတကာ ဈေးကွက်တင်ဖို့နဲ့ ဈေးနှုန်းကို ရူပီး ၅၀၀ (၁၀ ဒေါ်လာ) အထိ ချဖို့ စီစဉ်နေတယ်လို့ Datawind က ဆိုပါတယ်။

ဒီ Tablet ရလိုက်တဲ့ နယူးဒေလီက ကျောင်းသားတွေကတော့ သူတို့တွေဟာ Facebook နဲ့ Twitter ကို အမြဲသုံးနေကြတာမို့ အခုလို ဈေးချိုချိုနဲ့ ၀ယ်ရတာကြောင့် အင်မတန် ကျေးဇူးတင် ၀မ်းသာကြောင်း၊ ဒီ Tablet ကိုသုံးပြီး twitter ကနေ ကျေးဇူးတင်စကား ပထမဆုံး ပြောမယ်လို့ ဆိုပါတယ်။

အင်တာနက် ချိတ်ဆက်ဖို့ Wifi ကနေပဲ သုံးရမယ့် အခက်အခဲ ရှိနေပေမယ့်၊ Aakash ရဲ့ မူရင်း ရည်ရွယ်ချက်ဖြစ်တဲ့ ကွန်ပြူတာကို ဈေးနှုန်းချိုသာစွာနဲ့ လူတိုင်း ကိုင်တွယ်အသုံးပြုနိုင်ရေး ရည်ရွယ်ချက်ကြောင့် နိုဝင်ဘာလကုန် ဈေးကွက်ထဲ ရောင်းချမယ့်အချိန်ကျရင်တော့ အိန္ဒိယတိုင်းသားတို့ ကြိတ်ကြိတ်တိုး ၀ယ်ကြမှာ ဧကန်ပါပဲ။